Адрас райвыканкама: 211361, Віцебская вобласць, г.п. Бешанковічы, вул. Чуклая, 13
Тэлефон прыёмнай: 8 (02131) 6-42-45
E-mail: priemnay@beshenkovichi.gov.by
Напярэдадні новага навучальнага года ў раёне прайшла прыёмка школ і дашкольных устаноў. На працягу трох дзён члены камісіі на чале з намеснікам старшыні раённага выканаўчага камітэта Г.А.Філіпенкі правяралі, наколькі гатовыя ўстановыадукаціі да сустрэчы дзяцей у новым навучальным годзе. Па папярэдніх дадзеных, 1 верасня ў раёне за парты сядуць 1362 вучні, у дашкольных жа установах з нецярпеннем чакаюць крыху больш за 500 дзетак.
- У цэлым прыёмка садоў і школ прайшла паспяхова, - адзначыў начальнік аддзела па адукацыі райвыканкама Аляксандр Іванавіч Ерашоў. - Намі правяралася ўсё - наяўнасць неабходнага абсталявання, мэблі, дыдактычных матэрыялаў, падручнікаў, планаў работы ... Члены камісіі вывучалі літаральна кожны метр як унутраных памяшканняў устаноў адукацыі, так і прылеглых да іх тэрыторый. Бо тут не можа быць дробязяў, на коне - здароўе і жыццё нашых дзяцей.
Несумненна, касметычны рамонт праводзіўся ва ўсіх школах, дзіцячых садках. Але не сакрэт, што ў кожнай навучальнай установе год ад года з'яўляюцца свае праблемы, бо большасць будынкаў былі пабудаваныя не адзін дзясятак гадоў таму і патрабуюць больш сур'ёзнага рамонту.
У гэтым годзе, напрыклад, быў праведзены бягучы рамонт аконных блокаў у СШ № 1 райцэнтра, нямала намаганняў прыклалі і на абнаўленне тут двух спартыўных залаў. На 2021 год запланаваны рамонт СШ № 1. Адрамантаваны дзвярныя блокі ў СШ № 2 гарпасёлка. У бліжэйшы час пачнецца капітальны рамонт Астровенскай дзіцячы сад-сярэдняй школы, дзе будзе адрамантаваны дах, часткова заменены вокны. Зараз жа сюды набылі новую музычную апаратуру, якая дазволіць больш якасна праводзіць масава-забаўляльныя мерапрыемствы. У Ульская сярэдняй школе замянілі вентыляцыю, набылі новы школьны аўтобус. Таксама для ўстаноў адукацыі (для правядзення ўрокаў працоўнага навучання) былі набыты 15 швейных машынак, для дзіцячых садоў і школ закупілі 30 ложкаў «Рамонак».
Радуе сваімі «навінкамі» і цэнтр карэкцыйна-развіваючага навучання і рэабілітацыі. Дзякуючы спонсарскай дапамозе ў цэнтр набылі Дом Савы - сэнсарна-дынамічную залу з наборам спецыяльных падвесных снарадаў для заняткаў па метадзе сэнсарнай інтэграцыі і іншым карэкцыйна-развіваючым тэхналогіям. Абыйшоўся ён у 14 тысяч рублёў. Акрамя таго, у самы бліжэйшы час тут будзе ажыццёўлены рамонт дзіцячай гульневай веранды і санвузлоў.
У гэтым годзе з'явіліся новыя архітэктурныя формы на прышкольных тэрыторыях у СШ № 2 райцэнтра, Каранеўскай дзіцячы сад-базавай школе, Бачэйкаўскай СШ і раённым цэнтры дзяцей і моладзі.
Добрае ўражанне ў правяраючых склалася ад устаноў дашкольнай адукацыі: камфорт і ўтульнасць хлапчукам і дзяўчынкам забяспечаны не толькі ў будынках, але і на тэрыторыях.
Канчатковыя вынікі гатоўнасці школ і дзіцячых садоў да новага навучальнага года падвядуць на штогадовай жнівеньскай настаўніцкай канферэнцыі.
