У Бешанковіцкім раёне аб'яўлены конкурс на лепшую вулічную навагоднюю елку

Бешанковіцкі райвыканкам абвясціў яшчэ аб адным раённым конкурсе, прымеркаваным да святкавання Новага года, - конкурс на лепшую вулічную навагоднюю елку «Навагодні карнавал». Яго галоўная мэта - стварыць святочную атмасферу ў гарпасёлку і добры настрой яго жыхарам у перадсвяточныя і святочныя дні.
Удзел у конкурсе могуць прыняць арганізацыі і прадпрыемствы розных формаў уласнасці, грамадскія аб'яднанні, а таксама жыхары раёна. Для гэтага неабходна вырабіць дэкаратыўную елку з выкарыстаннем падручных матэрыялаў і ўсталяваць яе на Цэнтральнай плошчы г. п. Бешанковічы ў тэрмін да 15 гадзін 23 снежня.
Умовы конкурсу наступныя: вышыня елкі павінна быць не менш за 1 метр, апора для размяшчэння на адкрытай пляцоўцы - устойлівай, а выкарыстаныя для стварэння елкі падручныя матэрыялы - не змяняць свае ўласцівасці і знешні выгляд пры розных умовах надвор'я.