Адрас райвыканкама: 211361, Віцебская вобласць, г.п. Бешанковічы, вул. Чуклая, 13
Тэлефон прыёмнай: 8 (02131) 6-42-45
E-mail: priemnay@beshenkovichi.gov.by
Штогод восень правярае вясковых працаўнікоў на ўменне супрацьпаставіць капрызам надвор’я сваё прафесійнае майстэрства, аператыўнасць, сталасць, забяспечыць правядзенне ўсіх відаў работ у комплексе, захоўваючы тэхналогію.
Сёлетні год — не выключэнне. Аднак пасяўная кампанія ідзе надзвычай складана. Шэраг праліўных вераснёўскіх дажджоў на пэўны час прыпыніў палявыя работы, зараз яны актывізаваліся. Надвор’е надвор’ем, ды спадзявацца трэба толькі на сябе. Што аграрыі ў большасці сваёй і робяць.
Па дадзеных на 30 верасня, у гаспадарках раёна пасеялі 52% азімых, ці 5555 га. Рупліўцы СУП «Свіціна-ВМК», напрыклад, справіліся з заданнем на 54,5% (заправілі збожжам 545 га з 1000 па плане). Пшаніца гатунку «Элегія» першай рэпрадукцыі ўжо заняла плошчу 156 га, трыцікале — 389 га. Сяўба даручана самым вопытным, лепшым з лепшых. Галоўны свіцінскі сейбіт —Юрый Аляксеевіч Любачка. Падвозіць насенне — Мікалай Віктаравіч Шут, падрыхтоўкай глебы займаюцца Юрый Рыгоравіч Галай, Аляксандр Аляксандравіч Воранаў, Віктар Мікалаевіч Дарожка, Дзяніс Пятровіч Шлык.
— На кожнага з іх заўсёды можна спадзявацца, даручаць любую справу і быць упэўненым у тым, што механізатары ўсё зробяць хутка і якасна,— не раз падчас нашай размовы падкрэслівала дырэктар гаспадаркі Л. П. Мамойка.— Людзі ведаюць усе палеткі, кожны куток раллі, бо не адзін дзясятак гадоў шчыруюць у сельгасарганізацыі.
Надвор’е прыспешвае, а жыццё віруе. Працоўны дзень механізатараў пачынаецца з агляду і рамонту тэхнікі, затым — запраўка, а ў сем гадзін спяшаюцца на поле бою, дзе шчыруюць да цямна (з двума перапынкамі на абед). Аграрыям пастаўлена задача — у максімальна сціслыя тэрміны завяршыць сяўбу азімых культур. І яны справяцца. Галоўнае зараз — каб тэхніка і ўласнае здароўе не падвялі.
