За час рэалізацыі інвестыцыйнага праекта ў ПВГУП «ТАНДЗІПАК» што ў Бешанковічах створана 50 працоўных месцаў

Вялізныя фуры заходзяць на пагрузку прама ў памяшканне склада прыватнага вытворча-гандлёвага ўнітарнага прадпрыемства «ТАНДЗІПАК». Створана яна ў райцэнтры на базе былога аграсэрвісу ў выніку рэалізацыі ў Бешанковіцкім раёне інвестыцыйнага праекта па ўключэнню ў гаспадарчы абарот невыкарыстоўваемых будынкаў і збудаванняў.

З верасня 2018 года будынкі прыведзены ў парадак, а на пустых плошчах разгарнулася новае дрэваапрацоўчая вытворчасць.

- Аб'ём укладзеных інвестыцый у асноўны капітал, - распавядае дырэктар прадпрыемства Аляксандр Пятровіч Арцюх, які прыйшоў у «ТАНДЗІПАК» у лістападзе 2018 г. намеснікам кіраўніка па вытворчасці, а ў студзені 2019-га ўзначаліў калектыў, - склаў больш за 150 тысяч долараў. Толькі на выкананне будаўніча-мантажных работ па прывядзенню збудаванняў у прыдатны прамысловы для эксплуатацыі выгляд затрачана 356,8 тысячы рублёў. Сёння будынкі прадпрыемства абсталяваны ацяпляльнай сістэмай, умацаваныя падлогі, зроблены частковы рамонт даху, пабудаваны сушыльны цэх, добраўпарадкавана тэрыторыя ...

Паралельна з рамонтам асвойваўся выпуск новай прадукцыі: у цэхах усталёўвалася абсталяванне, ішло навучанне зборшчыкаў вырабаў з драўніны. Так як аналагічных «ТАНДЗІПАКУ» вытворчасцей у Беларусі толькі два - ва Ушачах і Маладзечна - першыя прафесійныя ўрокі калектыву прадпрыемства давала яго заснавальнік Райда Будрыкене. А зараз сваім вопытам і майстэрствам з навічкамі дзеляцца ўжо ветэраны.

За час рэалізацыі інвестыцыйнага праекта ў ПВГУП «ТАНДЗІПАК» створана 50 працоўных месцаў. У жыхароў раёна з'явілася магчымасць атрымаць працу, асабліва ў тых, хто па якіх-небудзь прычынах страціў ранейшае месца і не змог знайсці новае. Улетку ў цэху па вырабе вырабаў з драўніны панавала асаблівае ажыўленьне: разам з дарослымі пляценнем кошыкаў займаліся старшакласнікі школ раёна, студэнты, якія прыехалі дадому на канікулы.

У цяперашні час ПВГУП «ТАНДЗІПАК» вырабляе і рэалізуе шырокі спектр упакоўкі з асінавага і бярозавага шпону: кошыкі і чашы для грыбоў, ягад, гародніны, садавіны, іншых прадуктаў харчавання. У цэхах прадпрыемства працуюць больш за 30 жыхароў раёна.

З пачатку бягучага года ў «ТАНДЗІПАК» па накірунку ўпраўлення па працы, занятасцi i сацыяльнай абароне райвыканкама прыйшлі 34 чалавекі. Сярод іх не толькі жыхары Бешанковічаў, навакольных вёсак, але і ульскай, бачэйкаўскай, астровенскай, вярхоўскай зон. Часткова кампенсацыю праезду для іх да працы і назад узяло на сябе прадпрыемства, даўшы людзям рэальную магчымасць працаваць і зарабляць. Сярод зборшчыкаў вырабаў з драўніны ёсць надомнікі. Усе разам вырабляюць і адпраўляюць на экспарт да чатырох фур кошыкаў штомесяц.

Вырабы з драўніны перад далёкай дарогай праходзяць дбайную сушку, падрыхтаваны да доўгага захоўвання і транспартавання, не набіраюць вільгаці. Фактычна ўся прадукцыя, якая вырабляецца Бешанковіцкім «ТАНДЗІПАКАМ» ідзе на экспарт, карыстаецца попытам у Літве, Германіі, Польшчы. У прадпрыемства заўсёды ёсць заказы, і нават пандэмія не стала гэтаму перашкодай.

"Зара"